مشاهدة النسخة كاملة : مرحبا ياحسين الأسلمي!!!
عبيدالله العرابي
06-27-2005, 02:26 PM
الشاعر / حسين الأسلمي
سعداء بتواجدك معنا .
والفرصه اللي تناسبك على راحتك طال عمرك
وإستلم لاهنت
مرحبا باللي ليا منّه وعد وفىّ وعوده=جا على الميعاد لايأخر ولاقدم ثواني
ياحسين الزاخر إستبشر ولجلك فاح عوده=وأنت شاعر لاحضر حضّر جزيلات المعاني
حسين الأسلمي
06-29-2005, 08:21 PM
المعذره يالعرابي
مانتهبت للموضوع ألا الليله
واللعب معك شرف لي
*********************
البقا بك .. ونت حزمه .. مير أنا من عرض عوده=إنت شاعر .. كل شاعر لجل شعرك جاك عاني
لو تهيض المدلهمه ... ماتروع من رعوده=خابرينك .. كم جروح(ن) من مضاريبك تعاني
عبيدالله العرابي
06-30-2005, 02:10 AM
الله يشرّف مقدارك ياحسين .
ماهناك أي مشكله أنا قلت على راحتك
المسأله تسليّ .
وأنا اللي لي الشرف بمجاراتك طال عمرك .
إستلم يالقرم.
لاتزيد ولا تنقّص كل جيّد عند جوده=وأدري إنك مأنت دون الجدي وسهيل اليماني
سرّها ونشوف من يخسر ومن يغنيه فوده=وإن خسِر راع الهزيله ماخسر راع السماني
عيضه العيسي
06-30-2005, 06:52 AM
السلام عليكم ورحمة الله وبركاته
عبيدالله العرابي/حسين الأ سلمي/محاوره وبدايه
رائعه لاهنتو واصول متابعين ومستا نسين
لكم التحيه وعساكم على القوه
حسين الأسلمي
06-30-2005, 11:45 AM
حيا الله / عيضه العيسى
ونتشرف بمتابعتك
،،،،،،،
واستلم يالشاعر ..
لو أنا ذيب الصحاري.. فأنت من جملة أسوده=يرحم الله من عرف قدره.. ونا عارف مكاني
إن مشى سرحان بالميدان ما عــدّى حدوده=ولا يكشّر بالنياب ألا على بعض الحصاني
عبيدالله العرابي
06-30-2005, 03:36 PM
حيااك الله ياعضه .
أشكرك على المتابعه . شرفتنا يالغالي .
إستلم يالأسلمي
شاعرٍ والله يكافينا صداقتك اللدوده=إنت مثل اللي يقول الخوف قربه فيه أماني
كيف أجي لحسين هذاالأسلمي وأبحث سدوده=وأكشف المستور قدام العرب قاصي وداني
حسين الأسلمي
06-30-2005, 04:58 PM
يضربن قدام خلق الله ،، ونا عندي شهوده=ثم يبكي ثم يسبقني على القاضي... شكاني
بيننا : مثْل الذي من عقب مااشتدت عضوده=يوم علمته على رمي السهم عجّل رماني
لايشك أحد إنك استاذي ...
وأنا التلميذ العاق
عبيدالله العرابي
06-30-2005, 05:20 PM
هههههههههههههههههههههههههههه
والله إنك أستاذ شعر وخلق .
الحين زان القاف .
إستلم ياحسين
مات بن داؤود مادل الخلايق غير دوده=لو وراهم علم ماطاعوه وسليمان فاني
ياحسين أطيْب لك نزول الجبل ولاّصعوده=قول لاتحتار واللي طاعني صعْب يعصاني
حسين الأسلمي
06-30-2005, 09:14 PM
ياسلالالالام عليك ...
استلم يالذيب
الهوا والجن وطيور الفلا كانت جنوده=والحديد بأمر ربي للنبي داود لاني
نطلع لصم الجبال وكل منزالن نروده=ياعرب شوفو عشيري .. كيف جابن ،، وابتلاني!!
عبيدالله العرابي
06-30-2005, 11:50 PM
ياسلااااام عليك يابطل ..
المحاوره معك لها طعم مختلف .
إسلم .. وإستلم
أنت فارس في يدينه شاش وسيوف محدوده=ماتعْرف إني وصلتك لين يصهلّك حصاني
من نويت تسير للزاخر خطاويك معدوده=لو نبي نذبحك مايفزع فلان ولا فلاني
حسين الأسلمي
07-01-2005, 02:58 AM
وصلت للحلق يامسلم
العرابي يذبح ضيوفه .. وبيدينه يقوده=لكن المولى عزيز الشان من ذبحه حماني
يالعرابي لك وعد .. والدرب هذا ما نعوده=خلني أرجع لبيتي حي ياذرب اليماني
عبيدالله العرابي
07-01-2005, 05:34 AM
أنت في الزاخر . ياحسين
إستلم لاهنت
لاتخاف الموت وأنته فارسٍ تقدح زنوده=وآنت لاتطمع بضيفه دايمه طول الزماني
جيت من كيفك وفي معوادك حبال معقوده=أنت متثقف وتقرا في كتاب الأصفهاني
حسين الأسلمي
07-01-2005, 12:03 PM
عسى ربي يستر منك
خذ ياعميل الخير ...
العواقب لا تناطحنا فلا هي بامحموده=إن ذبحناكم فلا لك بالبدايل شخص ثاني
ون ذبحتوني ذبحتو شيخ خاشع في سجوده=قاضب المصحف ويقرا الكهف والسبع المثاني
عبيدالله العرابي
07-01-2005, 02:51 PM
يالله خارجنا منك إنت ياحسين
لكن إستلم ..
لو تبعت الصادر من العلم ماتغوى وروده=كيف أزهب بندقي وأذبحبها أغلى من خواني
مايجيك ألا المقدّر خل قلبك في ركوده=لاتبلاّني بتهمه ماتضوي لك ضماني
حسين الأسلمي
07-01-2005, 05:33 PM
الحمد لله
وصلنا لبر الأمان
بالنهايه من بساتين الوفا نقطف وروده=النفل والشيح والقيصوم ويا الديدحاني
نرسله للشاعر اللي بالوزا يثبت وجوده=يالعرابي لك تحيات الوفا واحلى الأماني
عبيدالله العرابي
07-01-2005, 05:38 PM
بيض الله وجهك ياحسين .
الحقيقه كانت محاوره وجدت بها المتعه ووجدت بها أريحية حسين وخلقه العالي
إلى ان نلتقي على خير في محاوره أخرى .. أبلغ سلامي للأصيل وتراه مطلوب من واحد في المضايف;-)
عبد العزيز الجراح
07-02-2005, 05:12 AM
الشاعرين الكبيرين
عبيد الله العرابي
وحسين الأسلمي
كانت محاوره رائعه جداً...
استمتعنا بها كثيراً...
الله يعطيكم العافية...
إلى أن نراكم في محاورة قادمة...
دمتم بخير...
أخوكم / عبد العزيز الجراح
حسين الأسلمي
07-02-2005, 08:05 AM
أخي العزيز / عبيدالله العرابي
دائماً وأبداً لك مكانة خاصة في قلب أخوك الأسلمي
وما في القلب أعظم مما يكتبه القلم
وأما الأصيل فيبلغك سلامه
وهو مع صاحبه " بعيد النظر "
مدّهرييييين :97:
**************************************
الأخ العزيز / عبدالعزيز الجراح
سعدنا بتواجدك
وشهادتك نعتز بها كثيراً
ولك مني أجمل تحية ..